فضيحة: تسريب مكالمة بين سيغما كونساي لسبر الأراء و مواطن تونسي

فضيحة_سيغما كونساي

 

تمكن فريق الإستخبارات بتونس نيوز من إعتراض مكالمة بين شركة سيغما كونساي لسبر الأراء و مواطن تونسي، كان فحواها التالي:

– ألو

– ألو… عسلامة خويا معاك شركة سيغما كونساي لسبر الأراء نجم نطرح عليك بعض الأسئلة.

– تفضل أختي أما فيسع راني مستعجل

– مسيو، لشكون باش تصوت في الإنتخابات الجاية؟

– مانيش باش ننتخب جملة … كرهتها السياسة.

– يزي مالتفدليك خويا العزيز ، هذا واجب وطني ووه… شبيه نداء تونس موش عاجبك؟

– موش عاجبني حد و ما نحب حد

– لا عاد يا ميسيو … وسع بالك تلقاهم الصغار منرفزينك ، ماهو خوذ بخاطري، أنا والله ارتحتلك من صوتك، تقول سي الباجي يحكي معايا.

– شكون الباجي؟؟ تحكي على نورالدين الباجي اللي يغني؟؟

-ههههه….. لا عاد … نحكي عالبجبوج ، تي سي الباجي قايد السبسي، رئيس نداء تونس اللي تحب تنتخبو سيادتك.

– أنا باش ننتخبو؟؟؟ يا مادموازال قتلك مانيش بـ…………

– و الله يعطيك الصحة يا ميسيو، تعرف تختار… صحة ليها مرتك طاحت براجل عندو ذوق، و زيد على هكة نحب نقلك اللي نتيجة سبر الأراء هذا أكثر من شطر الأصوات ماشية لنداء تونس، خمسة وخميس عليكم.

– و إنتي أختي كيفاش عرفت النتيجة قبل ما توفاو خدمتكم؟؟

– سافا سافا ميسيو سجلنا اختيارك و انشاء ربي معاكم…. بالله سلملي على المدام أكيد ذوقك هايل في النساء كيما ذوقك في الأحزاب،هههههه

– ألو … ألو … يا مادموازال… يا هم … مطلق راني.

– تيييييت تيييييت تييييت

 

Close
Please support the site
By clicking any of these buttons you help our site to get better